Нядзельная раніца выдалася пахмурнай, было відавочна, што неўзабаве пойдзе дождж. Так яно потым і атрымалася. Але гэтая акалічнасць не перашкодзіла маляўнічаму тэатралізаванаму прадстаўленню, якое разгарнулася на адкрытай пляцоўцы раённага цэнтра культуры і народнай творчасці. Абрадавае свята Масленіца сабрала не занадта многа слаўгарадчан, як планавалі арганізатары, бо надвор’е ў той дзень не зусім спрыяла мерапрыемству. Аднак тыя, хто прыйшоў на свята, не пашкадавалі і праводзілі зіму весела і актыўна.
Рамеснікі і майстры дэкаратыўна-прыкладнога мастацтва, раённы Дом рамёстваў, цэнтр дзіцячай творчасці, цэнтр сацабслугоўвання насельніцтва, кінатэатр «Радзіма» прадставілі свае эксклюзіўныя вырабы на выставе-продажы. Чаго тут толькі не было! А для маленькіх удзельнікаў свята работнікі ДУА “Яслі-сад №4 г.Слаўгарада” прапанавалі забаўляльныя гульні, спаборніцтвы, словам запрашалі адпачыць настраёва.Побач праходзілі спартыўныя мерапрыемствы, і трэба сказаць, што моладзь, дый і прадстаўнікі старэйшага пакалення тут былі заўважаны, правяралі свае сілы ў розных выпрабаваннях.
З імправізаванай сцэны святкаваць Масленіцу запрашалі артысты РЦК і НТ. Гульні і конкурсы, жарты і песні не давалі сумаваць слаўгарадчанам. Спадабаліся гасцям і нумары мастацкай самадзейнасці работнікаў Целяшэўскага СДК і Бярозаўскага СК.
Што за Масленіца без бліноў? – запытаеце вы. Сапраўды, без іх свята не атрымаецца. Па традыцыі, ганаровае месца было аддадзена менавіта гэтай страве. Пакаштаваць абавязковы атрыбут старажытнага славянскага свята жадалі як дарослыя, так і самыя маленькія жыхары нашага горада. Блінамі частавалі персанажы свята, прама з гарачай патэльні можна было іх набыць і ў гандлёвай кропцы райпа.
Вось так з запалам і весялосцю мы сустрэлі доўгачаканую вясну. Аднак капрызуля пакуль не спяшаецца парадаваць нас цяплом, па якім мы ўсе так засумавалі. Сіноптыкі прагназуюць, што яно прыйдзе ў трэцяй дэкадзе месяца. Калі так, то засталіся лічаныя дні. Крышачку цярпення, і наступіць сапраўдная вясна!
Тэкст і фота Святланы БЯЛЯЕВАЙ.