Пастфактум: на другі дзень Вялікдня вёска Ляцягі стала месцам святочнага мерапрыемства

 

На другі дзень Вялікдня вёска Ляцягі стала месцам святочнага мерапрыемства. Артысты аўтаклуба, Бярозаўскага сельскага клуба, удзельнікі вакальнага ансамбля «Крошечки» Новаслабодскага сельскага клуба, майстрыхі раённага Дома рамёстваў арганізавалі для мясцовых жыхароў тэатралізавана-абрадавае свята, прысвечанае Вялікдню.

У пачатку сустрэчы старшыня Гіжэнкаўскага сельвыканкама Мікалай Янкоў павіншаваў ляцягцаў з вялікім хрысціянскім святам і пажадаў моцнага здароўя, дабрабыту ў сем’ях і вясновага настрою.

Вядучай канцэртнай праграмы выступіла загадчыца аўтаклуба Галіна Максімава. Яна разам з маленькімі артыстамі нагадала вяскоўцам беларускія звычаі і традыцыі. Уся тэатралізаваная пастаноўка і канцэртная праграма пераносілі гледачоў у беларускую хату, дзе адбывалася Велікодная сустрэча. На ёй былі і песні, і танцы, і гульні. Вяскоўцы шчырымі апладысментамі і ўсмешкамі дзякавалі артыстаў. Пазітыўныя эмоцыі таксама выклікала выступленне артыстаў з Бярозаўкі, якія выконвалі ролі валачобнікаў. Яны адорвалі гледачоў сваім таленавітым выкананнем народных песень пад музычны акампанемент.

Напрыканцы свята ўсіх прысутных запрасілі пакаштаваць традыцыйныя велікодныя стравы.

Тэкст і фота Аксаны НЯМЦОВАЙ.

Поделиться