МЫ НАВУЧЫЛІСЯ ЖЫЦЬ І ПАСЛЯ

Больш за тры дзесяцігоддзі мінула з той пары, калі мы даведаліся, што такое радыяцыя. І зусім не з вучэбнікаў ці з навукова-папулярных фільмаў. Трагедыя на Чарнобыльскай АЭС прымусіла нас пераглядзець сваё стаўленне да жыцця, здароўя. Геаграфія нашай краіны таксама змянілася: толькі на Слаўгарадчыне зніклі больш за 20 населеных пунктаў. Людзі былі вымушаны шукаць долі ў іншых кутках краіны, пакінуць свае родныя мясціны. Таму 26 красавіка для беларусаў – дата, да якой ставяцца па-асобаму. У гэты дзень мы ўспамінаем, што можа зрабіць з цэлымі народамі тэхнагенная катастрофа.

Традыцыйна наш раён у гэты дзень наведваюць паважаныя госці і прымаюць удзел у мітынгу, прысвечаным гэтай журботай даце.

Алея памяці пахаваных вёсак у гэтым годзе атрымала нібыта новае жыццё і добраўпарадкаванне, якое праводзілася тут падчас рэспубліканскага суботніка, што дазволілі ёй прымаць удзельнікаў мітынгу ў адноўленым выглядзе.

Намеснік губернатара Валерый Малашка падчас свайго выступлення высока ацаніў тую жыццесцвярджальную сілу слаўгарадчан, якая дазволіла рэгіёну не проста застацца на карце вобласці, але і развівацца.

– Сёння Слаўгарад – гэта не проста маленькі куток Беларусі. Гэта рэгіён, які мае канкрэтныя планы па развіццю, перспектывы. Шмат чаго ўжо зроблена ў накірунку аднаўлення эканомікі, сацыяльнай сферы, вытворчасці. Трагедыя на Чарнобылі падзяліла жыццё, у тым ліку і вашага раёна, на “да” і “пасля”. І мы сёння назіраем, як раён, пацярпелы ад той катастрофы, будуе жыллё, дзіцячы садок, адкрывае новыя працоўныя месцы. Да таго ж, і гэта не можа не радаваць, Слаўгарадчына займае лідзіруючыя пазіцыі ў вобласці па нараджальнасці. З боку краіны робіцца ўсё, каб падтрымаць такія раёны. І мне прыемна бачыць, што гэтая дапамога мае рэальнае ўвасабленне,” – адзначыў Валерый Анатольевіч.

Да помніка ад раённай улады, грамадскасці, сілавых структур, моладзі і працоўных калектываў былі ўскладзены кветкі.

Кіраўнік раёна Сяргей Міхалюта таксама выступіў перад аўдыторыяй. Ён агучыў захады, якія робяцца ў раёне з тым, каб жыццё слаўгарадчан было камфортным, утульным, адпавядала сучасным нормам.

Кацярына Мельнікава таксама звярнулася ад жыхароў раёна з удзячнасцю кіраўніцтву вобласці за ўвагу да Слаўгарадчыны, яе жыхароў, іхніх праблем.

Хвілінай маўчання ўдзельнікі мітынгу аддалі даніну памяці ахвярам той катастрофы.

Уладзімір РЫЖАНКОЎ.

Фота аўтара.

Поделиться