Калі на нарыхтоўку кармоў, якімі будзе харчавацца жывёла напрацягу года, адведзены невялікі адрэзак часу, сельгасвытворца не мае права на памылку і прамаруджванне. Разумеючы важнасць і адказнасць кампаніі, корманарыхтоўшчыкі КСУП “Заранскі” мабілізавалі ўсе свае сілы на аператыўнасць яе правядзення. Каб даведацца, як працаўнікі прадпрыемства шчыруюць у спякотныя дні сезона вялікай травы, мы наведаліся на мясцовыя палеткі і сустрэліся для размовы з кіраўніком Святланай Каратковай.
Яна паведміла, што для паўнацэннага забеспячэння кармавой базай жывёлагадоўчай галіны гаспадаркі неабходна нарыхтаваць 13100 тон сенажу. Корманарыхтоўчая кампанія у КСУП “Заранскі” ідзе поўным ходам, і там задзейнічалі максімальныя рэсурсы, каб забяспечыць своечасовасць і выкананне тэхналагічных патрабаванняў. На ўчарашні дзень працаўнікі прадпрыемства нарыхтавалі 2830 тон сенажнай масы, з якіх 130 – па новай тэхналогіі ў палімерную плёнку.
На касьбе траў заняты майстравы механізатар Віталь ВАРАБ’ЁЎ, які шчыруе на трактары “Беларус-3522” з касой “КПР-9”, і з даведзенымі аб’ёмамі спраўляецца выдатна. Падбор і драбленне зялёнай масы на кормаўборачным камбайне “КВК-800” выконвае вопытны працаўнік Сяргей СІВУХІН. Усе сельскагаспадарчыя працы ажыццяўляюцца ў комплексе. На адвозцы сянажнай масы ад камбайна заняты Генадзь СУВОРАЎ на “МТЗ-3032” і Аляксей РАМАНЬКОЎ на трактары “Беларус-1221”.
– З самай раніцы механізатары на працоўным месцы. Некаторыя нават раней шостай гадзіны ўжо завіхаюцца вакол сваіх “жалезных коней” на мехдвары, бо трэба ўпэўніцца ў працаздольнасці тэхнікі. А потым увесь дзень працаўнікі шчыруць на корманарыхтоўцы, нягледзячы на спякотнае надвор’е, да позняга вечара. Хачу адзначыць іх пазітыўны настрой на працу: кожны разумее, што ад асабістага ўкладу залежыць вынік агульнай справы. У абмежаваныя тэрміны ад іх патрабуецца максімум аператыўнасці, зладжанасці, вытрымкі і цярпення, – разважае Святлана Караткова.
Тэкст і фота Аксаны НЯМЦОВАЙ.