Арцём ЦІХАНАЎ у прафесіі “пажарны-выратавальнік” чалавек ужо не новы: паўтара года ён з’яўляецца членам калектыва райаддзела па надзвычайных сітуацыях. І па ягоных словах, не памыліўся, што абраў гэты шлях свайго развіцця. Хаця мог пайсці і іншым. Бо ўжо мае прафесію, якую атрымаў пасля вучобы ў архітэктурным каледжы ў Магілеве. Да таго ж адзін год ён адпрацаваў у ПМК-274. А пасля была служба ў арміі, якая таксама стала яркім успамінам. Справа ў тым, што служыў Арцём у роце ганаровага караула. Той, хто хоць крышачку блізкі да гэтай тэмы, разумее, наколькі гэта адказная служба. Бо юнаку прыходзілася прымаць удзел у парадах на ўзроўні рэспублікі. “У 2019 годзе мы ўдзельнічалі ў парадзе 3 ліпеня. Гэта было вельмі адказна. Страявая падрыхтоўка ў нас была на асобым кантролі. Хваляванне, разумеецца, было. Але мы вытрымалі: усё дзейства прайшло на высокім узроўні”, – узгадвае Арцём зараз.

Пасля дэмабілізацыі малады хлопец вырашыў паспрабаваць сябе ў пажарнай службе. Дзе ўжо больш за паўтара года працуе. І робіць гэта, па словах кіраўніцтва райаддзела, вельмі і вельмі паспяхова. “Арцём не з тых, хто будзе марна бавіць час, седзячы ў “гаджэце”. Ён адказны, надзейны работнік. Ён з тых, хто канкрэтна мае мэту ў жыцці і паступова ідзе да яе”, –падкрэсліваюць у адміністрацыі райаддзела.

Што ж, няхай і гэтаму маладому барацьбіту з агнём і іншымі надзвычайнымі сітуацыямі шчасціць па жыцці, а ў гэтай высакароднай професіі, якую ён абраў, дасягае высокіх вынікаў. Пакуль што Арцём мае ўсё для гэтага патрэбнае. Са святам і цябе, наш малады пажарны-выратавальнік!