У гэтыя красавіцкія дні сельгаспрадпрыемствы акрамя пасяўной кампаніі займаюцца падкормкай азімых збожжавых і рапсу. Як праходзіць гэта адна з найважнейшых веснавых палявых работ,

мы назіралі ў КСУП «Заранскі»

Спыняемся каля «Беларуса–1221», да якога спяшаецца падобная здалёк на верталёт, невялікая сельскагаспадарчая машына пад назвай «Раса». З дапамогай механізатараў, якія кіруюць тэхнікай, з бочкі, прычэпленай да трактара, у бачок, змешчаны на «Расе», па пластыкавай трубцы пацякла празрыстая вадкасць. Гэта КАС – вадкае азотнае мінеральнае ўгнаенне, у якім маюць патрэбу і азімыя збожжавыя, і азімы рапс, і шматгадовыя травы. Хвіліна – і «Раса» з поўным бачком гатова працягнуць паліваць поле з дружнымі расточкамі. Механізатар Мікалай Бусянкоў, кіроўца «Расы», пагадзіўся на непрацяглую размову.

– Да жніва ўраджай трэба вырасціць, – усміхаецца мужчына.

– І не проста ўраджай, а добры. Вось зараз мы над гэтым працуем. Сёння падкормліваем азімыя збожжавыя на апошніх гектарах.

– На Мікалая Мікалаевіча ў любой справе можна спадзявацца, ён чалавек працавіты, адказны, правільны, – сказала пра работніка кіраўнік сельгаспрадпрыемства Святлана Караткова.

– Ён унёс падкорм на 200 га рапсу і 1017 га збожжавай  групы.   Акрамя гэтага, дапамагаў  прадпрыемствам  «Зімніца», «Слаўгарадрайаграпрамтэхніка», «Ляснянскі Агра». На нашых палетках яму працы засталося на адзін дзень, а потым працаўнік адправіцца дапамагаць у іншыя сельгаспрадпрыемствы.

Пасля непрацяглай гутаркі «паляцеў» Бусянкоў на сваёй «машынцы» па полі, забяспечваючы збожжавыя энергіяй азотных угнаенняў.