Трэба памятаць сваю гісторыю
Весела і цікава праводзілі вольны час вучні ў зімовым аздараўленчым лагеры ДУА “Лапаціцкая сярэдняя школа”. Акрамя гульняў, конкурсаў, віктарын, прагляду пазнавальных фільмаў былі арганізаваны і экскурсіі. Так вучні наведалі музей Баявой славы ДУА “Зімніцкая базавая школа”, які быў заснаваны ў 1970 годзе.
Дзеці з захапленнем слухалі настаўніцу гісторыі Ірыну Васільеўну Языкову, якая паведала пра заснавальніка музея Бычынскага Мікалая Міхайлавіча, былога дырэктара Зімніцкай сярэдняй школы. Менавіта гэты будынак, у якім мы знаходзіліся, і быў пабудаваны па ініцыятыве Мікалая Міхайлавіча, які, дарэчы, быў таленавітым фатографам. Фотаздымкаў у яго было аж сорак кілаграмаў. З цікавасцю вучні разглядалі сцены музея, аформленыя яго сынам Уладзімірам, заслужаным мастаком Расіі. Можна ганарыцца, што першыя работы такога заслужанага дзеяча Расіі, нашага земляка, знаходзяцца ў Слаўгарадскім раёне.
З хваляваннем дзяўчынкі і хлопчыкі разглядалі экспазіцыю “Малая радзіма ў полымі вайны”. На пытанне Ірыны Васільеўны: ці трэба нам гэта ведаць і помніць, дзеці адказалі: “Трэба абавязкова! Каб не паўтарыліся тыя жудасныя часіны, каб мы жылі ў шчасці і міры, каб шанаваць тых, каму мы абавязаны жыццём”.
Падчас развітання вучні шчыра падзякавалі за пазнавальную і змястоўную гутарку.
Жанна Шчэрба, выхавальнік аздараўленчага лагера.
