Чарговае пасяджэнне райвыканкама прайшло ўчора, і галоўнай тэмай яго стала забяспечанасць кадрамі аграпрамысловай галіны раёна. У рабоце таксама прымаў удзел Дзмітрый Пярмінаў, галоўны спецыяліст ўпраўлення па рабоце з кадрамі аблвыканкама.

«Пытанне, якое вынесена на павестку дня, лічы стратэгічнае.  Без спецыялістаў у сельская гаспадарцы, як у прынцыпе і паўсюль, нечага чакаць сур’ёзных вынікаў. Мы  вымушаны шукаць новыя  захады па замацаванню моладзі на вёсцы. Мяркую, гэта на сённяшні дзень задача нумар адзін», – задаў тон сустрэчы старшыня райвыканкама Сяргей Міхалюта і запрасіў да мікрафона Марыю Астроўскую, начальніка аддзела арганізацыйна-кадравай работы райвыканкама. Якая,  у сваю чаргу, распавяла, якім чынам у раёне ладзіцца кантроль за кадрамі, як арганізавана павышэнне іх  кваліфікацыі і гэтак далей. З прамовы стала вядома і пра захады па стымуляванню моладзі.

Марыя Вячаславаўна агучыла шэраг гаспадарак, якія маюць патрэбу ў ключавых спецыялістах. А некаторыя з іх выконваюць архіважную задачу – забеспячэнне харчовай бяспекі краіны – без такіх амаль з 2017 года. Як прагучала, спецыялісты альбо праходзяць навучанне ў Горацкай акадэміі і ў хуткім часе прыйдуць на першае працоўнае месца, альбо проста не пажадалі заставацца на вёсцы пасля адпрацоўкі.

Аб тым, якімі стымуламі, у тым ліку ўключанымі ў калдамоўленасці гаспадарак, кіраўнікі  імкнуцца заахвоціць моладзь, распавяла Святлана Дзенісенка, старшыня раённага аб’яднання прафсаюзаў. У прыватнасці аратар зрабіла аналіз усіх калектыўных дамоўленасцяў, якімі карыстаюцца гаспадаркі. І высновай стала, што з розным поспехам, але для зацікаўленасці, у тым ліку і матэрыяльнай, робіцца нямала. Ёсць, праўда, моманты, дзе скрозь фармуліроўкі бачна адсутнасць патрэбных крокаў у бок маладога работніка. Але такія факты хутчэй выключэнне. У асноўным у гаспадарак жадаюць моладзь зацікавіць і затрымаць для працы. Святлана Міхайлаўна засяродзіла ўвагу аўдыторыі на канкрэтных прыкладах, калі кіраўніцтва гаспадаркі знаходзіла агульную мову з моладдзю. «Сёння моладзь не тая, што была нават 20 гадоў таму. Мы, калі зацікаўлены ў гэтым, павінны адкінуць фармалізм у вырашэнні ў тым ліку і бытавых патрэб новаспечаных спецыялістаў. Калі хочаце, трэба стаць ім бацькамі, дапамагчы вырашыць праблемныя моманты, атуліць апекай», – падкрэсліла выступоўца.

Казаў аб гэтым і прадстаўнік аблвыканкама. «Мы ўсе былі маладымі работнікамі, памяталі, які гэты няпросты і адказны перыяд, і як запатрабавана нават добрае слова падтрымкі. А тым больш, калі яшчэ і рублём працадацель дапаможа. Таму заклікаю пры наяўнасці рэзерваў падтрымаць моладзь. Трэба вярнуць аўтарытэт працы на зямлі. Ён, нажаль, у апошні час згублены. Калі мы запалім у вачах спецыяліста агеньчык, падтрымаем у ягоных першых працоўных кроках, мяркую, і будучае ён сваё звяжа з сельскай гаспадаркай куды ахвотней», – рэзюмаваў Дзмітрый Сяргеевіч.

У зале прысутнічалі кіраўнікі гаспадарак, кадравікі, іншыя спецыялісты АПК. Таму такая размова мела прадметны характар, была пазбаўлена дэмагогіі, а была накіравана на пэўнае дасягненне выніку.

Аб гэтым у заключным слове казаў і Сяргей Міхалюта. Ён загадаў аб’яднаць усе найбольш прагрэсіўныя захады па стымуляванню моладзі на весцы з тым, каб работу ў гэтым накірунку вывесці на новы ўзровень. «Нішто не перашкаджае браць перадавы вопыт калег і ўкараняць у сябе. Тым больш Слаўгарадчына – зямля гасцінная. А яшчэ лепш, калі яна для маладых спецыялістаў яшчэ стане і другой малай радзімай», – падкрэсліў кіраўнік раёна.