Нематэрыяльным каштоўнасцям – пільная ўвага
14 мая Слаўгарадчына стала пляцоўкай для правядзення абласнога семінара-практыкума “Ахова нематэрыяльнай гісторыка-культурнай спадчыны: метадычнае кіраўніцтва, рэкамендацыі” для спецыялістаў устаноў культуры Магілёўскай вобласці. Сустракалі гасцей раёна ў кінатэатры “Радзіма”, дзе была арганізавана выстава-экспазіцыя “Спадчына Магілёўскага Падняпроўя”, якая ўражвала разнастайнасцю і самабытнасцю вырабаў майстроў рэгіёна, захаваўшых нацыянальныя традыцыйныя рамёствы, а таксама было прадстаўлена шмат інфармацыі на друкаваных носьбітах.
Вітала ўдзельнікаў семінара намеснік старшыні райвыканкама Алена Шаўцова. Адзначыўшы багатую культурную спадчыну Слаўгарадчыны, яе каларыт і вялікую значнасць у гістарычным плане, Алена Міхайлаўна пажадала ўсім прысутным плённай працы і цікавага знаёмства з нематэрыяльнымі каштоўнасцямі Слаўгарадчыны.
Падчас тэарэтычнай часткі семінара эксперт Рэспублікі Беларусь Міжурадавага камітэта па ахове нематэрыяльнай культурнай спадчыны (ЮНЕСКА), фасілітатар Глабальнай сеткі па павышэнню патэнцыяла ў рэалізацыі Канвенцыі ЮНЕСКА аб ахове нематэрыяльнай культурнай спадчыны Ала Сташкевіч агучыла перыядычную справаздачнасць (нацыянальны даклад) 2021 года па вышэйназванаму дакументу. Інвентарызацыя культурнай спадчыны з удзелам супольнасцей, асноўныя падыходы ў адпаведнасці з Канвенцыяй 2003 года, этычныя патрабаванні да інвентарызацыі, свабодная, папярэдняя і інфармацыйная згода носьбітаў на дзейнасць, звязаную з нематэрыяльна-культурнай спадчынай таксама сталі тэмамі выступлення Алы Барысаўны.
Асноўныя напрамкі дзейнасці ўстаноў культуры Рэспублікі Беларусь у межах выканання Канвенцыі ЮНЕСКА аб ахове нематэрыяльнай культурнай спадчыны прааналізавала вядучы спецыяліст аддзела інфармацыйна-аналітычнага забеспячэння дадатковай адукацыі дарослых ІПК і ПК УА “Беларускі дзяржаўны ўніверсітэт культуры і мастацтваў” Алена Каліноўская. Яна ж агучыла ў рамках “круглага стала” і лепшыя практыкі аховы культурнай спадчыны ў Рэспубліцы Беларусь, а таксама праблемы і перспектывы дзейнасці па захаванню такіх каштоўнасцяў. Трэба адзначыць, што ў рабоце вучобы таксама бралі ўдзел спецыялісты Магілёўскага абласнога цэнтра народнай творчасці і культурна-асветніцкай работы Іна Балаўнёва і Аляксандр Глуздоў. За прэзентацыю культурнай спадчыны слаўгарадскай зямлі і мясцовых напрацовак адказвалі кіраўнікі і спецыялісты ўстаноў культуры раёна на чале з начальнікам аддзела ідэалагічнай работы, культуры і па справах моладзі райвыканкама Галінай Купрыянцавай.
Падчас практычнай часткі семінара яго ўдзельнікі наведалі помнік прыроды рэспубліканскага значэння “Блакітная крыніца”. Там іх увазе былі прадстаўлены выставы майстроў дэкаратыўна-пракладнога мастацтва, майстроў-сыравараў. Госці слаўгарадскага краю таксама пазнаёміліся з працай цэнтра экалогіі крынічнай вады і паглядзелі тэатралізаванае прадстаўленне “Паданне аб “Блакітнай крыніцы”, сустрэліся з настаяцелем Свята-Петра-Паўлаўскага Храма-помніка вёскі Лясная Іераманахам Афанасіем. Акрамя іншага, у насычанай праграме дня было наведванне тэматычных пляцовак “Лясная – месца воінскай славы”, “Турыстычныя маршруты”, пасля чаго госці пакаштавалі стравы нацыянальнай кухні на тэматычнай выставе-прэзентацыі.
